Páxinas

CPI Manuel Padín Truiteiro

Departamento de Lingua Galega e Literatura

Portafolio Dixital

Os materiais das aulas na rede

Recursos

Sobre lingua, literatura e outras temáticas de interese
 

25N, berramos NON contra a violencia de xénero!

xoves, 29 de novembro de 2018

O alumnado do IES de Soutomaior tomou onte os corredores e os patios do noso centro para expresar con palabras, carteis e os seus propios corpos o seu rexeitamento claro e rotundo á violencia contra as mulleres poñendo así fin ás actividades conmmorativas do 25N, Día Internacional contra a Violencia de Xénero.
Durante o recreo as rapazas e os rapaces de 1º de Bacharelato realizaron a performance "Conxela a violencia", na que en intervalos de dous minutos conxelaron escenas de violencia que queren que desaparezan. A acción, coordinada polas profesoras de Educación Plástica e Educación Física, foi o preludio que anunciaba unha actividade que dende hai días se viña organizando en segredo nas aulas dos grupos de 2º e 4º da ESO, que prepararon unha manifestación sorpresa que conduciu a todo o alumnado do centro ao patio, onde, entre lemas e consignas que esixiron a fin da violencia machista, se deu lectura ao manifesto, que leron as alumnas Paula Puch e Lucía Costas.
MANIFESTO
 Con motivo da celebración do día para a eliminación da violencia contra a muller, o alumnado, profesorado e persoal do IES de Soutomaior queremos berrar…
Basta xa!
Por todas as mulleres que destacaron nos ámbitos da ciencia, do deporte, das artes e da literatura e que foron esquecidas pola historia…
Basta xa!
Por todas as mulleres que se ven obrigadas a casar sen poder escoller con quen.
Basta xa!
Por todas as rapazas do mundo que non teñen dereito á educación.
Basta xa!
Por todas as mulleres que sofren desigualdade no traballo.
Basta xa!
Por todas as mulleres que teñen medo de andar soas pola rúa.
Basta xa!
Polas mulleres maltratadas, violadas ou asesinadas.
Basta xa!
Polas mulleres que non teñen dereito a ser mulleres.
Basta xa!
Por todas elas, e por todas nós.
Basta xa!

A obra teatral 'Anagnórise' inaugurou as actividades extraescolares do novo IES de Soutomaior

domingo, 25 de novembro de 2018



A novela Anagnórise, de María Victoria Moreno, foi a última lectura do curso pasado que fixo o alumnado de 3º ESO do CPI Manuel Padín Truiteiro para a materia de Lingua Galega. E Anagórise,o espectáculo teatral que preparou a compañía Limiar Teatro, é a primeira actividade extraescolar que se fai no novo IES de Soutomaior, á que acudiu aquel alumnado que agora xa se atopa en 4º da ESO.

A representación tivo lugar o pasado mércores 10 de outubro no Multiúsos de Arcade grazas á organización da Concellería de Cultura de Soutomaior, que nos convidou a participar da anagnórise, o recoñecemento da traxedia, o encontro cunha verdade oculta que tivemos fronte ao nariz. Unha historia de amor atemporal. Dos amores de xuventude que ninguén esquece, do primeiro amor. Nicolau marcha da casa para atopar un novo camiño que, paradoxo do destino, o levará de volta a casa. Saiu procurar e atopouse.

Para a compañía teatral, tamén foi unha ocasión especial, pois esta foi a última representación que fixeron dunha peza coa que homenaxearon a autora á que se lle dedicou o Día das Letras Galegas 2018.

Contamos todas


Así se presenta o espectáculo ao que asistiron os mozos e mozas de 1º de Bacharelato o pasado martes 20 de novembro. Brais e Marta, membros da compañía Tropa de Trapo, achegáronnos a dúas historias de mulleres que perseguiron e alcanzaron os seus soños, foran as mociñas da terceira idade da aldea de Torneiros (Allariz) ou as bravas mulleres que conseguiron poñer fin á guerra que masacraba as súas vidas en Liberia. Exemplos de vida, exemplos de mulleres que se enfrontaron a diversos retos. Historias reais, sinceras e inspiradoras. Contos para reflexionar, modelos de empoderamento, de superación, de igualdade e de rebeldía. 


Logo, a través de diversas dinámicas activas e participativas, soou a voz do alumnado, que debateu sobre a violencia de xénero e a necesaria igualdade cunha intensidade e unha madurez que nos fai ser optimistas de cara ao futuro.



Esta foi unha das actividades que tiveron lugar ao longo desta semana previa ao 25N no marco do programa de prevención e sensibilización sobre a violencia de xénero que, baixo o lema "E ti, que fas pola igualdade?" organizou o CIM do Concello de Soutomaior.

Pola súa banda, todos os grupos de 1º a 4º da ESO participaron o mércores 21 e o venres 23 nos obradoiros que a psicóloga especialista en igualdade Paula Sánchez Álvarez impartiu un ano máis no noso centro. Da súa man, o alumnado abordou os conceptos de igualdade dende a propia responsabilidade e en positivo, mais sempre dende unha análise crítica coas estruturas patriarcais aínda dominantes na sociedade. A identificación das condutas sexistas e os estereotipos de xénero, a revisión dos roles femininos e, sobre todo, da nova masculinidade e o auxe global do movemento feminista foron outros dos aspectos traballados cunha xeración que avanza de forma imparable cara ao cambio.


Onde o mundo se chama Galiza (1ª parte)

xoves, 27 de setembro de 2018

Colofón

Verba estirpe, marmaña, Sárdoma na Terra. 
Eran estas as nocións: touza, carqueixa, 
corga, Carnota. As gándaras do sentido, as poulas 
nas que o ser se entorga: toutizos, coios. 

Támega, Tamuxe, Tameiga, tal
coma brañas enchoupadas, Arnoia
que é escomincipio e a derradeira frouma do alentar de meu. 
Visítame, Arousa, paúlo. 

Deixa que che meta os dedos na boca, señora miña Arousa. 
Un peirao na Barbanza que se chama Pondal. 
E cabernas de arca, e cabernas de couso. 
Arteixo vira en cambas polos cotos herdados,
polas searas do esprito que nunca foi vencido. 

Esposo mascato é, píllara tímida eu. 
Dille berce ao inimigo, e veralo esmaciar. 
En Patia río hai que chaga a ser chamado Eu, ou qué. 
Deva devala en meras, por panasqueiras tenras, 
polos biduídos dos bidos lonxanos. 

Primeira cousa: a lousa, morte ao estranxeiro opresor. 
Toxo esgrevio acódenos, arnal, por consolarnos na desfeita. 
Lamas, Ulla, Limia, illó: carpazona, eih, coa virilla quente. 
Ai, como tu es veiga pre min. 

A túa crencha, prenda, teu buraco, teu buraquiño, bouza. 
Cómo sodes, as searas, qué cabazo. 
As cabanas de colmo a poboarnos a ánima esfragada 
neses caborcos. 

Os beizos, as várceas, a saudade. 
Non esquezas as verbas estirpe 
que son morte pró estranxeiro opresor, elas nos lavan. 
Sempre dirás: URCES. 
Repite: os carballos 

Estes versos, extraídos do poemario Estirpe, de Xosé Luís Méndez Ferrín, evoca con intensidade a atalaia granítica onde morría a Europa occidental á chegada dos conquistadores romanos, o Finis Terrae, a fin do mundo para os antigos pobos do continente europeo e do Mediterráneo. 

Daqueles pobos castrexos que acabaron sucumbindo ante o empuxe da Roma imperial fálanos a primeira parte (11'40'') deste capítulo de Historias de Galicia, que xa visualizamos na aula. Se o precisas, volve a ver o vídeo e responde as preguntas.   

'A arte de trobar',de Santiago Lopo, a proposta literaria para comezarmos o curso

mércores, 26 de setembro de 2018

No século XIII, unha "troupe" de artistas itinerantes procedentes de Galicia percorre os reinos do Camiño de Santiago. É un momento de cambio político, cultural e lingüístico nunha Europa inmersa en cruentas loitas de poder. As persecucións relixiosas e as ansias expansionistas coinciden co auxe das cantigas galego-portuguesas e co declive da lírica provenzal. Un códice oculto, a Inquisición, a herexía cátara e os segredos da alquimia uniranse ás cantigas medievais para conformar unha engaiolante trama nunha novela con grandes doses de intriga. A arte de trobar é unha novela luminosa, escrita con felicidade e coñecemento, que non renuncia ao humor. Configurada a partir de capítulos curtos, é capaz de integrar unha trama implacable coa tradición máis notable de versos en galego e occitano. Documentada con rigor, e dotada dun ritmo moi áxil, A arte de trobar constitúe un vibrante fresco desta nosa historia, que se escribiu en folla de pergamiño e con pluma de ave, á beira do mar.


Santiago Lopo (Vigo, 1974) é escritor, profesor e tradutor. Como narrador publicou Game Over (2007, VI Premio de Novela por Entregas de La Voz de Galicia), Peaxes (Xerais 2009), Hora zulú (2012, XXIV Premio de novela García Barros), A Diagonal dos Tolos (2014, VIII Premio Narrativa Breve Repsol) e o relato "A voz das nereidas" (2016). A arte de trobar (Premio Xerais de Novela 2017) é a súa quinta novela. E hai poucos días vén de gañar novamente o Premio de Narrativa Breve Repsol na súa XII edición con Extraordinario.

David Alján, Premio ao Mellor Xornalista Xuvenil

mércores, 23 de maio de 2018

Esta entrevista á escritora e académica Fina Casalderrey valeulle ao alumno David Alján Lusquiños (3º ESO B) o 1º Premio no XV Concurso Mellor Xornalista Xuvenil que convoca o Programa Prensa Escola de La Voz de Galicia, que procura que os estudantes se familiaricen coa lectura do xornal e desenvolvan a súa capacidade de exposición e redacción. Nesta edición presentáronse máis de 3000 alumnos e alumnas que tiveron que demostrar o seu talento xornalístico ilustrando e redactando noticias, facendo entrevistas e escribindo artigos de opinión.
Ademais de ter a iniciativa de se poñer en contacto coa escritora e de se documentar moi ben sobre a súa traxectoria vital e literaria, David Alján demostrou a súa capacidade para seleccionar e plasmar por escrito a información máis relevante que obteu na longa conversa mantida con Fina Casalderrey, a quen lle agradecemos dende o noso centro a súa dispoñibilidade para colaborar neste traballo acedémico. A entrevista, limitada na súa extensión polo formato do concurso, será publicada nunha versión ampliada no novo número da revista Latexos, que coordina o profesor Eloi Gestido.
O acto de entrega dos premios terá lugar en Culleredo o sábado, 2 de xuño, no marco da festa Voz Natura que se desenvolverá na festa de Voz Natura. Ademais do diploma acreditativo, o noso alumno galou unha fin de semana en Londres para catro persoas. Unha vez máis, e xa van varias neste curso (I Concurso contra a Violencia de Xénero e Verbas para Comunicar 2018), felicitamos a David Alján por este novo galardón. Moitos parabéns!

Subiu ata o faiado da casa e alí…

venres, 18 de maio de 2018


Esta é a frase de comezo dun microrrelato de non máis de 500 caracteres co que podedes participar na Categoría Xuvenil (maiores de 13 anos) no VII Certame de Microrrelatos Feiraco, que remata este domingo 20 de maio. Debedes facer a súa entrega a través dunha aplicación específica instalada na páxina desta cooperativa leiteira.

Na vosa categoría, o xurado elixirá tres textos gañadores, que recibirán os seguintes premios:
  1. Fin de semana no Pazo de Lestrove (Padrón), con aloxamento dunha noite para tres persoas (un menor e dous adultos) en habitación dobre con cea incluída, ademais dun cartel chapado en vintage edición especial conmemorativa de Feiraco coa lenda "Practica a lectura". Valor do premio: 300€. 
  2. O segundo e o terceiro premios recibirán un lote de libros de literatura xuvenil galega cedidos pola SXPL (valorados en 150€) e mais un lote de produtos Feiraco (valorado en 25€).

Ilusión e compromiso nunha nova edición de Verbas para Comunicar

xoves, 17 de maio de 2018

Onte tivo lugar no pabillón da Montesiña a gala de entrega de premios do XI Concurso Verbas para Comunicar, que ten como obxectivo promover o uso da lingua galega entre a mocidade dun xeito lúdico e atractivo e asociado aos seus intereses e gustos con motivo do Día das Letras Galegas. Ao acto, ao que acudiron alumnos e alumnas do noso centro e do Colexio Santiago Apóstolo, foi conducido polo dúo Falabaratas, que deu paso á concesión de galardóns, entregados polo Alcalde, Agustín Reguera, e a Concelleira de Mocidade, Noelia Ocampo.

Nesta edición entregáronse case 300 traballos nas diferentes modalidades, entre textos, pezasde audio e gravacións audiovisuais. Hai que destacar unha grande presenza deproblemáticas como a violencia e a desigualdade de xénero e os lumes, que no outono pasado asolaron os montes do noso municipio. Dende o EDLG felicitamos a todos os participantes e animámosvos a manter, e mesmo mellorar, o nivel de cara ao ano que vén.

RELACIÓN DE TRABALLOS PREMIADOS DO NOSO ALUMNADO 

Redacción. Categoría A (12-14 anos).
- 1º Premio: Candela Paz Aguiar (1º ESO A), por Non!!!
- 3º Premio: Nikol Duarte Raña (2º ESO B), por Que é a vida?
- 5º Premio: Laura Pérez Barreiro (1º ESO A), por 12 meses para para o amor.
Redacción. Categoría B (15-18 anos)
- 2º Premio: Rime el Bahi (4º ESO B), por Branca Silueta.
- 6º Premio: Carala Mª Corugeira (2º ESO A), por As cinco inxustizas.
Audiovisual. Categoría A (12-14 anos) Individual
- 1º Premio: Xiara Suárez Valenti (2º ESO B), por Outra escola é posible.
- 3º Premio: Uxía Vidal Rubianes (1º ESo C), por A rapaza futbolista.
- 5º Premio: Sonia Baqueiro Abal (1º ESO B), por A autoestima.
- 6º Premio: Daniel Gallego Couñago (1º ESO C), por O peixiño.
Audiovisual. Categoría A (12-14 anos) Grupal (nesta categoría só se dan dous premios)
- 1º Premio: Izaskun Tellería e Lucía Costas (1º ESO B+C), por Parodiando a vida.
- 2º Premio: Anxo Barcia e Lola Barros (3º ESO C), por Non ao acoso.
Audiovisual. Categoría B (15-18 anos) Grupal (nesta categoría só se dan dous premios)
- 1º Premio: David Alján e Martín Otero (3º ESO B+C), por Dario.

Anagnórise... coñecer, descubrir quen es

Deseño de Luís Vilas
Hoxe é o Día das Letras Galegas, e non vemos mellor maneira que homenaxear a María Victoria Moreno que difundindo este fermoso tema d'A Banda da Loba, un grupo de mozas que veñen pisando forte no panorama da música galega actual. 

Nesa viaxe que supón a Anagnórise, a novela que lestes os alumnos e alumnas de 3º ESO no 2º trimestre, o protagonista vaise descubrindo a si mesmo e vánselle revelando as respostas a moitas preguntas que se arremuiñaban na súa mente. 

Como nesta canción, na viaxe da vida asoman a vertixe e os medos, mais hai que facela, descubrila, gozala e descubrirse. E se nesa viaxe lle facedes un oco á lingua galega, como fixo María Victoria Moreno, a estremeña que dixo aquilo de "a miña relación con Galicia e a miña opción pola súa lingua é simplemente unha historia de amor”, será máis rica.



Pecha a porta con coidado
moi amodo mira a un lado.
E descobre na equipaxe
o comezo dunha viaxe.

Recoñécese sen nome,
sinte o medo de estar lonxe,
a vertixe de que é ela
quen decide o que aceleran.

Imos xuntas viaxar
cara a un lugar... sen mar.
Imos xuntas viaxar
cara a un lugar.

Vese dona de si mesma,
sinte as cordas que se tensan,
no solpor cos sentimentos
o perigo é un momento.

O perigo é un momento.
Imos xuntas viaxar.

Anagnórise
Coñecer
Descubrir quen es

Non existen etiquetas,
van sen nome cara á meta,
vendo dende a escuridade
unha luz de ambigüidades.

Ailalala

Anagnóriseeeeee
Coñecer
Descubrir quen es.

Na procura de cidadáns máis críticos e responsables

xoves, 19 de abril de 2018


O noso centro acolleu o pasado mércores 11 de abril dous Obradoiros de Xornalismo impartidos pola periodista Paula Méndez Casais ao alumnado de 3º da ESO. A actividade, coordinada polo Departamento de Lingua Galega e o Equipo de Dinamización da Lingua Galega, forma parte do programa Xornalismo na Escola posto en marcha polo Colexio Oficial de Xornalistas e a Obra Social de La Caixa para un total de 90 centros educativos de toda Galicia.

Durante os 90 minutos que durou cada obradoiro, os rapaces e rapazas introducíronse da man desta xornalista no mundo dos medios de comunicación para coñecer e reflexionar máis polo miúdo sobre o seu papel na sociedade actual, o rol activo e crítico que a cidadanía debe exercer ante a información ou o manexo das diferentes fontes de información no contexto da eclosión dos medios dixitais e as redes sociais. A sesión, que combinou teoría e práctica, foi de especial interese para o alumnado cando se enfrontaron á identificación de noticias falsas, aos bulos e ás campañas de intoxicación, e decatouse de que en ocasións é transmisor de informacións non contrastadas a través das diferentes redes nas que están presentes. Ante este escenario complexo e cambiante, en que se fala da "era da post-verdade", Paula Méndez resaltou a importancia do xornalista como mediador entre a información e a cidadanía en relación a aspectos como dereito á información, á liberdade de expresión e ao compromiso ético co rigor e a veracidade.

Finalmente, tras as preguntas do alumnado, deuse por rematado un obradoiro que ademais de axudarnos a construír uns cidadáns do futuro máis críticos e responsables, serviron de complemento idóneo para os contidos que se están a impartir nas aulas.

Lecturas de 2º ESO para o 3º trimestre

martes, 10 de abril de 2018

Neste derradeiro trimestre do curso abrimos as lecturas a un  abano máis amplo de títulos de entre os que podedes escoller un para cumprir coa lectura obrigatoria da materia. Tamén podedes propoñer outra lectura, extraída doutras listaxes ou da vosa propia búsqueda, mais debedes comunicarllo con antelación ao profesorado, que debe aprobala. 

Son novelas de diferentes temáticas e para alumnos e alumnas con diferentes bagaxes lectoras. Neste conxunto de novelas hai espazo para a intriga e a aventura, para a investigación e os misterios por resolver, para os amores e as problemáticas adolescentes, para mergullarse no mundo da natureza e a ciencia ou das lendas e a historia... 

En definitiva, relatos de aquí e acolá que agardamos que respondan aos vosos intereses:
  • A miña planta de laranxa lima, de José Mauro de Vasconcellos, Editorial primerapersona. Sinopse
  • Investigación 091, de Pepe Carballude, col. Fóra de Xogo, Edicións Xerais de Galicia. Sinopse
  • O pintor do sombreiro de malvas, de Marcos Calveiro, col. Fóra de Xogo, Edicións Xerais de Galicia. Sinopse
  • Noite de voraces sombras, de Agustín Fernández Paz. col. Fóra de Xogo, Edicións Xerais de Galicia. Sinopse
  • A cova da moura, de Ana Carou, col. Meiga Moira, Baía Edicións. Sinopse
  • A evolución de Calpurnia Tate, Jacqueline Kelly, Kalandraka. Sinopse e 1º capítulo
  • Todo o tempo do mundo, de David Pérez Iglesias, col.Merlín,  Edicións Xerais de Galicia. Sinopse. 
  • O mundo secreto de Basilius Hoffman I. O ladrón de soños, de Fernando Cimadevila, col. Alcaián, Urco Editoria. Sinopse. Páxina Web. Booktráiler. Descarga do 1º libro
  • O mecanoscrito da segunda orixe, de Manuel de Pedrolo e traducido por María Victoria Moreno, col. Costa Oeste, Editorial Galaxia. Sinopse

María Victoria Moreno, escolma de recursos para o Día das Letras Galegas 2018


Xa non queda nada para festexarmos o Día das Letras Galegas 2018, o día en que a nosa literatura e a nosa lingua se visten de gala para celebrar a súa vizosa creatividade e a necesidade de promover e potenciar o uso do noso idioma para que cumpra 1000 primaveras máis.

Este ano a autora homenaxeada será María Victoria Moreno, a escritora estremeña que aló polo ano 1963 chegou a Pontevedra como profesora para asumir, conscientemente, unha vida e unha obra en lingua galega. Tal e como diría ela anos máis tarde, "a miña relación con Galicia e a miña opción pola súa lingua é simplemente unha historia de amor".  E así foi como a este amor e ao seu compromiso coa docencia e o ensino, que recoñecen moitas xeracións de pontevedreses e pontevedresas que pasaron polas súas aulas de lingua e literatura, sumou unha obra literaria que nos deixou algúns dos títulos máis recoñecidos entre o público infantil e xuvenil.

Ademais das numerosas actividades que se están a levar a cabo e a argallar ao redor da súa figura nestes meses, a continuación facemos unha selección de recursos e materiais que de seguro nos axudan a coñecer mellor a súa achega á cultura galega:
  • Real Academia Galega: inclúe unha biografía, información sobre a súa obra e unha interesante sección sobre as actividades que se están xerando ao redor da autora neste ano.

  • Seminario Galán: como todos os anos, os compañeiros e compañeiras do Seminario elaboraron un completísimo monográfico para levar ás aulas a obra e a vida da persoa á que se lle dedica esta efeméride. Materiais imprimibles (biografías, dípticos, exposicións, cadernos de actividades...), libros interactivos multimedia e álbum de imaxes da autora conforman un conxunto de recursos adptados a cada curso de Infantil e Primaria.
  • Letras Galegas 2018: a profesora Patricia Sánchez Lamas, autora do blogue de referencia A fiestra da mestra, non para e elaborou unha páxina web que, ao lado de fichas idóneas para imprimir e traballar na clase, incorpora unhas actividades tan orixinais como unha "Regueifa das Letras" e as "Píldoras para Victoria", ademais dunha "Biografía sonorizada" e un "Concurso das Letras". Van alá os nosos parabéns e agradecementos para esta compañeira polo seu traballo e por partillalo con nós!

Finalmente, incluímos a páxina da Secretaría Xeral de Política Lingüística, que inclúe traballos e propostas que se están a desenvolver nos centros de ensino, e a selección de recursos e novidades sobre as Letras da revista Botóns, o Portal Galega da Educación.

Leonardo e os fontaneiros, unha historia de María Victoria Moreno

Leonardo e os fontaneiros é a novela escollida para pechar o ciclo de lecturas de 1º ESO neste curso 2017-2018 e para honrar a memoria e a obra de María Victoria Moreno (Valencia de Alcántara-Cáceres, 1936-Pontevedra, 2005), a autora homenaxeada no Día das Letras Galegas. Ademais de ler, desta volta as historias de Antón e Leonardo van cobrar vida coa representación teatral que a compañía Ubú Teatro vai facer o vindeiro martes 24 de abril no Multiúsos de Arcade grazas á iniciativa da Editorial Galaxia e á organización do Equipo de Dinamización da Lingua Galega do noso colexio.

A novela conta a historia de Antón e mais o seu can Leonardo, que protagonizan unha historia apta para todas as idades, non só para o público infantil e xuvenil. É unha narración que se publicou por primeira vez no ano 1986 e que desde entón se converteu nun dos libros máis buscados por pequenos e grandes, pois aínda que foi escrito pensando en lectores de doce anos, ao final, como sucede con toda literatura de calidade, acabou sendo unha obra para todos. Antón é un neno que cursa 8º de EXB, o que hoxe sería 2º da ESO. Leonardo, a pesar do nome, non é un rapaz, senón un can... un can un tanto especial. Ao longo do libro suceden moitas cousas, tanto a Antón como a Leonardo. Quen as conta é Antón. E sabe contalas moi ben.

Agardamos que o alumnado de 5º e 6º de Primaria e de 1º da ESO do noso centro, así como os rapaces e rapzas do CPI O Toural de Vilaboa que se achegarán a Arcade, gusten das historias escritas e representadas que naceron no maxín de Mª Victoria Moreno e de Ubú Teatro.


Expresión literaria, creación audiovisual, xornalismo... Asumes o reto?

mércores, 14 de febreiro de 2018

Ademais dos concursos que anunciabamos hai uns días e que coñecedes ben por teren unha grande tradición no noso colexio, o XI Certame Verbas para Comunicar, e mais o VI Concurso de Relato Curto (FANPA), cuxo prazo remata o vindeiro 28 de febreiro, aquí vai unha nova remesa de convocatorias que están a chamar polos vosos traballos. E non serán os últimos que anunciaremos no noso blogue:

Reto Lector

  • Obxectivo: fomentar a lectura en galego entre os adolescentes e as adolescentes a través dun formato novidoso no que os rapaces se converten en vloggers (video blogger) literarios.
  • En que consiste? Enviar ao mail galaxia@editorialgalaxia.gal dous vídeos nos que se dea conta da lectura de dous libros da Editorial Galaxia de calquera das súas coleccións de narrativa para todas as idades: Árbore, Costa Oeste e Literaria. Os vídeos non poderán exceder os dous minutos de duración. Durante eses dous minutos, os rapaces deben comentar o contido da obra, os aspectos que máis lles gustaron e as razóns polas que recomendarían a súa lectura.
  • Categoría única: rapaces e rapazas de 12 a 16 anos. Prazos de presentación: a entrega dos vídeos estará aberta ata o día 31 de maio, e a resolución do xurado farase pública o 12 de xuño.
  • Premios: a rapaza ou rapaz gañador recibirá un Ipad de última xeración. Ademais, haberá cinco lotes de libros coas últimas novidades da Editorial para os cinco seguintes clasificados.
  • Bases do concurso: Galaxia.

III Concurso Ollo de Vidro de Booktráilers e Booktubers

  • Obxectivos: fomentar entre a cidadanía hábitos lectores, utilizando a lectura como fonte de información, aprendizaxe e enriquecemento persoal, ao mesmo tempo que se promove o uso do galego como vehículo de comunicación nas redes sociais.
  • En que consiste? Enviar a recomendocheunlibro@gmail.com unha destas pequenas pezas creativas, que consisten en resumir en non máis de 3 minutos de imaxes o contido dun libro.
  • Convocan: Biblioteca Neira Vilas, IES Castelao, Escola Oficial de Idiomas, Asociación de Veciños de O Calvario, Biblioteca Pública do Porriño,  IES Pino Manso e o Festival de Cans.
  • Categoría única: persoas e colectivos.
  • Prazos de presentación: a entrega dos vídeos estará aberta ata o día 23 de abril.
  • Premios:
    • Os traballos finalistas serán proxectados no festival.
    • 1º premio: 400€.
    • 2º premio: 250€
    • 3º premio: estancia en Cans con noite de hotel e entradas para asistir ao concurso de curtametraxes.
    • Todos os premios teñen tamén dotacións en lotes de libros e esculturas e placas conmemorativas.
  • Bases do concurso: Recoméndoche un Libro.

#AbrideaFiestra. Día de Rosalía de Castro 2018 (AELG)

  • Obxectivo: expandir o poder da palabra de Rosalía de Castro entre a xente nova.
  • Dúas categorías:
    • Infantil e Primaria: despois de facer un repaso da figura literaria da Autora, e dalgunhas lecturas que dean conta da pluralidade significativa da súa obra, proponse para o venres 23 de febreiro que cada alumna/o elabore, nun soporte que poida ser pendurado nunha fiestra ou pegado na parte interior dos vidros das fiestras (tea, cartolina ou similar), algún elemento iconográfico de Rosalía de Castro e/ou transcriba os seus versos soltos ou poemas completos para lles dar luz desde as fiestras e tentar facelos visíbeis socialmente.
    • Secundaria e Bacharelato: escenificación e gravación de mostras visibilizadoras da obra rosaliana que sigan o fío do lema #AbrideAFiestra, de xeito que o alumnado interaccione visualmente coa obra ou a figura de Rosalía e contribúa a espallala colectivamente, quebrando os muros herméticos e escuros que noutro tempo a silenciaron. Para estes efectos, suxerimos traballar sobre o texto do manifesto da AELG no Día de Rosalía de Castro.
  • Máis info.: páxina da AELG.

Youtubeiros

  • En que consiste? Youtubeir@s nace coa vontade de promover e visibilizar o uso do galego con vídeos de opinión e videotitoriais a través dunha das redes sociais máis influíntes do momento, YouTube.
  • Para quen? Maiores de 14 anos.
  • Categorías: vídeo-facermos, vídeo-opinarmos e canle.
  • Duración máxima: 5 minutos.
  • Idioma: lingua galega.
  • Prazo de inscrición: ata o 15 de marzo. 
  • A organización ofrece cursos formativos.
  • Bases completas aquí.
  • Páxina do concurso.
  • Organizan: Servizos de Normalización Lingüística dos concellos da Baña, Ames, Carballo, Ourense, Pontevedra, Ribadeo, Santiago de Compostela, Teo e O Grove, das Universidades da Coruña, Santiago de Compostela e Vigo e da Deputación da Coruña.
  • Traballos presentados e premiados na edición 2017.

II Concurso de Videopoemas sobre composicións poéticas de Rosalía de Castro e Manuel María

  • Certame que procura potenciar potenciación da creatividade artística a través da conxunción da palabra, o son e a imaxe, e o coñecemento e difusión da obra destes dous autores. 
  • Categoría: unha única a partir da ESO e participación individual ou grupal.
  • Prazo de preinscrición: até o 24 de marzo de 2018.
  • Prazo de presentación de orixinais: antes do 21 de abril de 2018.
  • Ligazón ás bases.
  • Convoca: Casa-MuseoManuel María

XVConcurso Mellor Xornalista Infantil e Xuvenil  

- Concurso convocado por La Voz de Galicia que procura que o alumnado se familiarice coa lectura e o manexo do xornal e que desenvolva a súa capacidade de exposición e redacción, baseándose en informacións publicadas na edición impresa ou dixital (Mellor Xornalista Infantil) ou mediante traballos orixinais de elaboración propia (Mellor Xornalista Xuvenil).
- Vai dirixido a todo o alumnado galego de: 
  • Educación Infantil, 1º e 2 de Primaria:  debuxo que ilustre unha nova.
  • Educación Primaria, de 3º a 6º curso e EE: reinterpretación dunha nova.
  • ESO: entrevista. 
- En todas as categorías os profesores deberán coordinar e revisar o traballo dos alumnos, ademais de orientalos na súa elaboración.
- Valorarase o interese dos traballos, o estilo xornalístico, a corrección gramatical e a presentación da páxina.
- Premios Infantil e Primaria: en cada categoría o 1º premio correspóndese cunha estadía de fin de semana no parque Warner para 4 persoas, unha cámara de fotos dixital para o 2º premio e mais un reprodutor MP4 para o 3º premio.
- Premios Xuvenil: unha estadía dunha fin de semana en Londres para 4 persoas para o 1º premio, un libro electrónico para o 2º premio e mais un altofalante inalámbrico para o 3º premio.
- O prazo de presentación remata o 30 de abril de 2018.
- Máis info.: bases.

Poñamos a nosa creatividade a proba!!!

xoves, 18 de xaneiro de 2018

En xaneiro non comezan as rebaixas no panorama cultural galego, senón a tempada alta de certames, concursos, feiras e eventos de todo tipo, que van collendo ritmo ata estourar con forza a mediados de maio co Día das Letras Galegas, que este ano estará dedicado á escritora María Victoria Moreno, pontevedresa de adopción, cacereña de nación e galega de elección.

Pois ben, dous dos concursos máis recoñecidos no noso colexio xa publicaron as súas bases e, como non podía ser doutra maneira, convidámosvos a participar. Son o XI Certame Verbas para Comunicar 2018, que convoca o Departamento de Xuventude do Concello de Soutomaior, e o VI Concurso de Relato Curto que organizan a Federación de ANPAS de Pontevedra, a editorial Kalandraka, o concello da capital e a Deputación. De momento, non nos chegaron os cartaces e os folletos, pero xa podemos adiantar a información básica de cada un:

XI Certame Verbas para Comunicar 

- Obxectivo: Promover o uso da lingua galega entre a mocidade e conmemorar o día das Letras
Galegas.
- Modalidades:
  • Redacción: dun texto en lingua galega que transmita unha idea, sentimento, opinión, etc., Só presentación individual. O tamaño do texto non poderá ser superior ás 12 liñas.  O soporte será o papel ou cartolina e o seu tamaño non poderá superar un folio A4, pero si poderá ser inferior a este. O formato de presentación do papel ou cartolina será libre. 
  • Audiovisual: elaboración dun vídeo (curta) ou audio (tema musical ou outros) cunha duración máxima de 5 minutos. Pode presentarse de xeito individual ou grupal (2 ou 3 persoas). Presentar en USB. Pode ser gravado con móbil ou cámara.  Acéptanse tamén en calidade HD. Mensaxe en galego escrita ou verbal. Tema e estilo: libre. 
- Categorías EN CADA MODALIDADE:
  • Categoría A: idades de 12 a 14 anos. 
  • Categoría B: idades de 15 a 20 anos.
- Prazo de presentación: ata o 27 de abril.Entrega de premios en maio para conmemorar o día das Letras Galegas. Pedir as bases na OMIX.
Podedes consultar os textos gañadores en anteriores edicións (ata 2009) premendo aquí.


VI Concurso de Relato Curto

Neste certame, no que alumnas como María González ou ex-alumnas como Olalla Castrillo xa chegaron á final e mesmo gañaron (le o relato de Olalla aquí), sempre presentamos traballos do colexio, a ver que pasa desta volta. As bases xa están colgadas na páxina web, pero a presentación tivo lugar hoxe en Pontevedra. Resumimos a información básica:
  1. Os relatos deberán ser orixinais, inéditos, non premiados noutros certames, de temática libre e escritos en lingua galega.
  2. Poderán presentarse todos os alumnos e alumnas dos centros públicos da provincia de Pontevedra de primaria, secundaria, bacharelato e formación profesional. Tamén poderán presentarse as persoas adultas (familiares, profesorado e alumnado universitario dos campus de Pontevedra e Vigo).
  3. Cada autor/a só poderá presentar un relato que terá unha extensión mínima de 200 palabras e máxima de 300. Estará escrito en Times New Roman, de tamaño 12 pt. e interliñado de 1,5 liñas.
  4. Os relatos enviaranse en arquivos en formato .doc, .docx ou .odt ao enderezo de correo electrónico certame.relatocurto@nontedurmas.org
  5. Enviaranse dous arquivos no mesmo correo: DATOS (para a organización cos datos básicos da persoa participante) e RELATO (para o xurado co título, o relato, o pseudónimo e a categoría).
  6. O prazo de envío dos textos finalizará o 28 de febreiro de 2018.
  7. O xurado seleccionará os 120 mellores relatos de entre todos os presentados e que formarán parte do libro. Esta selección de 120 finalistas darase a coñecer no mes de maio de 2018. Nunha segunda fase o xurado destacará 20 dos relatos finalistas e escollerá de entre eles o gañador de cada categoría (primaria, secundaria, bacharelato/FP e adultos). O resultado desta escolla darase a coñecer no acto de entrega de premios. 
  8. Os premios serán os seguintes: 
  • Para o gañador/a de cada categoría (primaria, secundaria, bacharelato/formación profesional e adultos): un vale de 200 euros, un lote de libros de Kalandraka, un xogo e unha lámina autenticada polo ilustrador Óscar Villán.
  • Para os 20 autores finalistas destacados: un obradoiro de creación literaria que impartirá no mes de xuño a escola de escritores da Asociación de Escritores en Lingua Galega.
  • Para os 120 autores finalistas: un libro colectivo cos seus relatos e co relato feito expresamente para o certame por un escritor profesional, nesta edición é Antonio García Teijeiro.
  • Tanto os relatos gañadores coma todos os finalistas publicaranse tamén no Diario de Pontevedra durante as vacacións de verán.

E se llo dis en galego?

martes, 16 de xaneiro de 2018

A Dirección Xeral de Xuventude, Participación e Voluntariado e mais a Secretaría Xeral de Política Lingüística da Xunta de Galicia volven convocar unha nova edición do concurso Lingua de Namorar, un certame que procura dinamizar o uso da lingua galega entre os mozos e mozas nas súas relacións persoais e nas novas tecnoloxías, nomeadamente, na Internet e na mensaxería instantánea.

O alumnado de 3º e 4º da ESO pode participar na Categoría A (de 14 a 19 anos), pero tamén pode animar ás amizades e familiares de entre 20 e 35 anos para que participen na Categoría B (de 20 a 35 anos). Este é un resumo das bases, que se poden ler de forma íntegra aquí. Así que xa sabedes, cavilade un pouco, sentide moito, redactade esa mensaxe de (des)amor e bulide, que o prazo de envío de textos remata o 29 de xaneiro (formulario de inscrición).

1. Características das mensaxes

Cada participante poderá enviar un máximo de dúas mensaxes ao concurso Lingua de namorar (extensión máxima de 350 caracteres para cada mensaxe). Estas mensaxes deberán estar escritas en lingua galega e poderán redactarse en prosa ou en verso.

2. Categorías de idade e premios

Establécense tres premios por cada unha das categorías de idade:

Categoría A (de 14 a 19 anos):

1° Hoveboard Nilox (rodas 6,5, batería 20 km., velocidade máxima 10km/h) e unha reprodución do Pergamiño Vindel conmemorativa da súa estadía en a Vigo en 2017 e 2018.

2° Cámara Fuji instantánea mini 9 ( fotos 62 x 46 mm.) e unha reprodución do Pergamiño Vindel conmemorativa do seu regreso a Vigo en 2017 e 2018.

3° Auricular Panasonic Diadema (bluetooth, 20 horas de autonomía) e unha reprodución do Pergamiño Vindel conmemorativa do seu regreso a Vigo en 2017 e 2018.

Categoría B (de 20 a 35 anos):

1° Smart TV Panasonic 32” (Full HD, TDT2, navegador web, 2 x HDMI) e unha reprodución do Pergamiño Vindel conmemorativa do seu regreso a Vigo en 2017 e 2018.

2° Smartphone Wiko 5” (16 GB, 4G, IPS HD, Android 7, 5/13 Mpx) e unha reprodución do Pergamiño Vindel conmemorativa do seu regreso a Vigo en 2017 e 2018.

3° Cámara deportiva Mini Wifi 2” (Full HD, ángulo 140º, resistente á auga 30m.) e unha reprodución do Pergamiño Vindel conmemorativa do seu regreso a Vigo en 2017 e 2018.

3. Prazos de participación e votación

O prazo para enviar as mensaxes remata o luns, 29 de xaneiro. Do 30 de xaneiro ao 2 de febreiro abrirase o período de votación. As persoas que desexen votar polas súas mensaxes favoritas deberán cubrir o formulario que se habilitará para o efecto.

4. Xurado e resolución
O xurado do concurso reunirase unha vez rematado o prazo de votación e elixirá as declaracións gañadoras de entre as 50 declaracións máis votadas polos usuarios e usuarias en cada unha das categorías de idade. Poderá consultarse aquí o nome das persoas gañadoras, a partir do 7 de febreiro.

5. Entrega de premios
O día 14 de febreiro terá lugar a entrega de premios do concurso Lingua de namorar 2018. O acto de entrega será no Museo do Mar de Galicia.

Mensaxes Gañadoras en edicións anteriores 
Lingua de Namorar 2017
Lingua de Namorar 2016

Lecturas de Ledicia Costas para 1º e 2º da ESO

Á espera de lermos A señorita Bubble (Ed. Xerais, col. "Sopa de Libros", 2017) e mais a súa última novela premiada, Plumas e unicornios (Premio Lazarillo de Tormes 2017), regresamos a Ledicia Costas nas lecturas para o alumnado de 1º e 2º da ESO.

En 1º da ESO a lectura do segundo trimestre do curso é Jules Verne e a vida secreta das mulleres planta, unha historia que arranca cando o afamado novelista chega o 21 de maio de 1884 a Vigo a bordo do seu impoñente iate atrás da pista das misteriosas mulleres planta. Se premedes aquí, poderedes escoitar como se xestou esta novela da boca da autora no programa Zig Zag da TVG. 

En 2º da ESO o título escollido é O corazón de Xúpiter, que relata a vida dunha moza, Isla, dende que os seus pais deciden mudar de cidade. Alí, mentres se vai adaptando ao novo instituto, segue a dar os seus paseos polo espazo, avistando planetas a través do telescopio, mergullada no ventre do universo. Casiopea, o nome da tartaruga máxica de Momo, era o nick que empregaba nos foros sobre astronomía nos que participaba adoito. Alí coñeceu a Xúpiter, alguén que semellaba saber moito de estrelas.

O alumnado de 4º da ESO do IES Castro Alobre de Vilagarcía realizou este booktráiler da novela para convidarvos a lela.

"ἀναγνώρισις", ou "Anagnórise", o ano do recoñecemento de María Victoria Moreno

Co 2018 entramos nun novo ano que tamén será o "Ano María Victoria Moreno", a autora a quen a Real Academia Galega acordou dedicar o Día das Letras Galegas. Mentres se dan a coñecer os primeiros actos e o deseño de numerosas actividades cos que a sociedade galega celebrará o legado literario desta pontevedresa de adopción, cacereña de nación e galega de elección, nós adentrarémonos na historia da súa novela Anagnórise, un título que marcou a adolescencia de numersoas de xeracións, como ben nos lembra Patricia Carballal Miñán, ex-alumna da escritora, neste artigo do Praza.

María Victoria Moreno Márquez (Valencia de Alcántara, Cáceres, 1939 - Pontevedra, 2005), licenciada en Filoloxía Románica pola universidade de Madrid, en 1963 conseguiu unha praza de profesora nun instituto de Pontevedra, establecéndose en Galicia. A súa identificación co noso país foi tan intensa que de seguida aprendeu o galego e o convertiu na súa lingua. Desde entón, toda a súa obra literaria está escrita en galego. Unha parte dela son contos e novelas dedicadas ao público infantil e xuvenil, como Leonardo e os fontaneiros, Mar adiante, O cataventos e Festa no faiado. A súa novela Anagnórise, xa traducida ao castelán, obtivo un grande éxito entre os lectores, e figura na lista de honra do IBBY de 1990. Con Guedellas de seda e liño recibiu unha mención especial White Ravens 2002. Colaborou na redacción de libros de texto e dirixiu a colección "Árbore" da Editorial Galaxia dende 1988, ano da súa creación. 

Anagnórise, unha fermosa novela de amor que figura entre os libros máis lidos e admirados pola mocidade galega
O protagonista principal de Anagnórise é Nicolau Arís, un rapaz con problemas que un día decide deixar os estudios no Instituto e marcha a Madrid co propósito de encontrar a uns amigos que se dedican a negocios relacionados co tráfico da droga. A viaxe en autostop faina cunha muller intelixente, de nome celosamente oculto, que o recolle na estrada, e coa cal fala durante as horas que pasan xuntos dentro do coche. Os diálogos, sempre áxiles e ocurrentes, pero tamén naturais, van revelando a rica personalidade de ambos. Xa no destino, Nicolau e a súa amiga ocasional sepáranse sen que o rapaz saiba o nome dela. Ó remate, despois de que Nicolau entre en contacto cos compañeiros que o agardan en Madrid, irá buscar a súa amiga. Só entón saberá o seu nome.

Avaliación da lectura
  • Data da proba escrita: xoves, 1 de febreiro de 2018.
  • A proba consistirá nun test de resposta múltiple e mais dunha serie de preguntas de desenvolvemento sobre a lectura.
  • Cualificación no total do trimestre: 15%.
  • Ademais, poderá ser proposto un traballo creativo desta novela, que recibirá unha nota á parte.
  • Poderase subir ata un punto a nota final da avaliación a partir da lectura, e posterior da traballo consensuado co profesor, dun libro da listaxe do 1º trimestre (http://linguadenegueiros.blogspot.com.es/2017/09/unha-ducia-de-lecturas-para-comezar-o.html) ou doutro título aprobado polo profesor.